ԱՄՆ-ում գնաճային սպասումները առաջիկա տարվա համար սեպտեմբերին աճել են մինչև 3.4%՝ օգոստոսի 3.2%-ից: Այս մասին են վկայում Նյու Յորքի Դաշնային պահուստային բանկի անցկացրած հարցման արդյունքները։

Սա վերջին հինգ ամսվա ամենաբարձր ցուցանիշն է։

Սննդամթերքի գնաճը սպասվում է 5.8% մակարդակում՝ նախորդ ամսվա 5.5%-ի փոխարեն, ինչը ռեկորդային է՝ 2023 թվականի մարտից ի վեր։ Սպառողները կանխատեսում են, որ առաջիկա տարում բենզինի գները կաճեն 4.2%-ով՝ օգոստոսյան 3.9%-ի փոխարեն։ Բնակարանների գների աճի սպասումները չորրորդ ամիսն անընդմեջ պահպանվել են 3% մակարդակում։ Գնաճային սպասումներն առաջիկա երեք տարվա համար անցյալ ամսին մնացել են 3% մակարդակում, իսկ հինգ տարվա համար աճել են մինչև 3%՝ նախորդ 2.9%-ից։

Հարցման արդյունքների համաձայն՝ առաջիկա տարում գործազրկության աճի հավանականության գնահատականը բարձրացել է 2 տոկոսային կետով՝ հասնելով 41.1%-ի, իսկ ՀՆԱ-ի աճի կանխատեսումը նվազել է 0.1 տոկոսային կետով՝ հասնելով 2021 թվականի ապրիլից ի վեր ամենացածր մակարդակին՝ 2.4%-ի։

Իրանը նոր գազային պաշարներ է հայտնաբերել Պազան հանքավայրում՝ հետախուզական հորատման արդյունքում։ Shana գործակալության փոխանցմամբ՝ այս մասին հայտնել է երկրի նավթի և գազի նախարար Մոհսեն Պաքնեժադը։

Նրա խոսքով՝ նոր հայտնաբերված պաշարները գնահատվում են շուրջ 10 տրիլիոն խորանարդ ֆուտ, ինչը համարժեք է մոտ 280 միլիարդ խմ-ի։

Պազան հանքավայրը գտնվում է Ջամ քաղաքի (Բուշեհրի նահանգ) մոտ՝ մոտավորապես 21 կմ հեռավորության վրա։ Նախարարը նշել է, որ այս հանքավայրում շուրջ ութ տարի հետախուզական աշխատանքներ չէին իրականացվում, և այժմ դրանք վերսկսվել են երկրորդ հետախուզական հորատման շրջանակում։

Պաքնեժադի խոսքով՝ գազի արդյունահանումը նոր բացահայտված պաշարներից կարող է մեկնարկել 40 ամսից։

ՀՀ վիճակագրական կոմիտեի հրապարակած տվյալների համաձայն՝ ընթացիկ տարվա հունվար-օգոստոս ամիսներին Հայաստանում արտադրվել է 185,654.7 տոննա պղնձի խտանյութ։ Նախորդ տարվա համադրելի ցուցանիշի համեմատությամբ՝ արտադրության ծավալն նվազել է 8.1%-ով։

Միևնույն ժամանակ, ցինկի խտանյութի արտադրությունը աճել է 6.7%-ով և կազմել 7,487.0 տոննա, իսկ մոլիբդենի խտանյութինն նվազել է 13%-ով՝ կազմելով 9,927.4 տոննա։

Ֆեռոմոլիբդենի արտադրությունը նվազել է 32.6%-ով և կազմել 1,977.6 տոննա, պողպատե խողովակների արտադրությունն աճել է 7.1%- ով և կազմել 16,455.1 տոննա, իսկ ալյումինե նրբաթիթեղի արտադրությունը աճել է 2.7%-ով՝ կազմելով 13,558.5 տոննա։

«ԼՈՒՅՍ» հիմնադրամն անդրադառնում է ՀՀ տնտեսության սոցիալ-տնտեսական զարգացումներին 2025թ. հունվար-օգոստոս ամիսներին։

Արտահանման ոլորտում պատկերը մնում է մտահոգիչ։ Արտահանման անկման տեմպը մի քանի ամիս շարունակ մեղմվելուց հետո, օգոստոսին կրկին վատթարացել է՝ հասնելով 40.8%-ի։ Հունվար-օգոստոս ամիսների արտահանման անկումը կազմել է 48.8%։ Անկման այս մեծ չափերը հիմնականում պայմանավորված են վերաարտահանման ծավալների նվազմամբ, և դրա մեծ մասը ճշգրտելու դեպքում արտահանման աճը կազմում է ընդամենը 2.5% (ըստ հունվար-հուլիս ամիսների տվյալների), ինչը ցույց է տալիս, որ արտահանման պոտենցիալն էականորեն նվազել է։

Տնային տնտեսություններին տրվող վարկերի աճի տեմպը շարունակում է էականորեն գերազանցել նրանց եկամուտների աճին։ Վարկերի ընդհանուր ծավալի աճը առավելապես պայմանավորված է սպառողական և հիպոթեքային վարկերի աճերով՝ համապատասխանաբար 31.1% և 26.3%: Հատկանշական է, որ բնակչության եկամուտները (աշխատավարձերը, դրամական փոխանցումները, իրական ՀՆԱ-ն և այլն) չեն աճում համապատասխան չափով։ Այս առումով եկամուտների համեմատ վարկերի զգալի տարբերությամբ առաջանցիկ աճը ֆինանսական կայունության տեսանկյունից միջնաժամկետում կարող է ռիսկեր առաջացնել։

2025թ.-ի հունվար-օգոստոսին Հայաստանի և այլ երկրների միջև արտաքին առևտրաշրջանառության ծավալը կազմել է 12,942.7 մլն ԱՄՆ դոլար։ 2024թ. համադրելի ցուցանիշի համեմատ արձանագրվել է անկում 41․1%-ով: 

Ըստ ՀՀ վիճակագրական կոմիտեի ներկայացված տվյալների՝ հաշվետու ժամանակահատվածում գործընկեր երկրների հետ առևտրային հարաբերություններում ներմուծումը գերազանցել է արտահանումը 2,940․9 մլն ԱՄՆ դոլարով:

Այսպես, 2025թ.-ի հունվար-օգոստոսին Հայաստանն արտահանել է 5,000.9 մլն ԱՄՆ դոլարի արտադրանք և այլ երկրներից ներմուծել 7,941.8 մլն ԱՄՆ դոլարի արտադրանք:

Հարկ է նշել, որ հաշվետու ամիսներին, նախորդ տարվա նույն ժամանակահատվածի համեմատ, արտահանման անկումը կազմել է 48․8%, իսկ ներմուծման ոլորտում արձանագրված անկումը՝ 34․9%։

Հայաստանում երեխային դպրոց ուղարկելը նախորդ տարվա համեմատ թանկացել է 20%-ով։ Sputnik Արմենիան այցելել է մի շարք տոնավաճառներ և մատչելի խանութներ, որտեղից մեծ թվով քաղաքացիներ են գնումներ կատարում։

Հաշվարկները ցույց են տալիս, որ երեխային դպրոց ուղարկելու համար շուրջ 95 հազար դրամ է պետք 2024 թվականի 80 հազարի փոխարեն։ Այսինքն` ուսումնական տարվա մեկնարկից առաջ ընդհանուր ծախսերն աճելեն գրեթե 15 հազար դրամով (գրեթե 20%):

Դպրոցականի ամենակարևոր պարագաներից մեկը պայուսակն է, որը Երևանի տոնավաճառներում և խանութներում կարելի է գնել 6 000-18 000 դրամով:

Պայուսակից բացի, աշակերտին պետք են տետրեր, գրիչներ, մատիտներ, ռետիններ, նկարչականալբոմ, գրչատուփ և այլ գրենական պիտույքներ: Կրտսեր և միջին դասարանների աշակերտներին անհրաժեշտ են նաև կոնկրետ առարկաների համար թեմատիկ տետրեր: Այս բոլորի միջինացված արժեքը 18․000 դրամ է։

Շուրջ 65 հազար դրամ էլ պետք է դպրոցական հագուստի համար։

Հայաստանի Հանրապետությունը ծանուցվել է ներդրումային վեճի մասին՝ գործարար, բարերար Սամվել Կարապետյանի և «Հայաստանի էլեկտրական ցանցեր» ընկերության դեմ ձեռնարկված գործողությունների կապակցությամբ։ Այդ մասին այսօր հատարարություն է տարածել «Տաշիր» ընկերությունների խումբը։

Հայտարարության մեջ նշվում է, որ ներդրումային վեճի մասին ծանուցումը նախազգուշացնող բնույթ է կրում։

Պաշտոնական այս ծանուցումն ուղարկվել է Սամվել Կարապետյանի և իր ընտանիքի անդամների կողմից ՀՀ պետական մարմիններին, այն հիմնված է Հայաստանի և Կիպրոսի միջև 1995 թ. հունվարի 18–ին ստորագրված ներդրումների խթանման և պաշտպանության համաձայնագրի վրա։

Նշվում է, որ այդ համաձայնագիրը ներդրողներին հնարավորություն է տալիս դիմել միջազգային արբիտրաժ՝ պետության կողմից իրենց իրավունքների խախտման դեպքում։ Նման գործընթացները բացասական ազդեցություն են ունենում երկրի ներդրումային գրավչության վրա։

«Տաշիր» ընկերությունների խմբի կողմից հրապարակած հայտարարության մեջ նշվում է, որ Կարապետյանների ընտանիքը պահանջներ է ներկայացնում Սամվել Կարապետյանի և նրա բիզնեսի դեմ սկսած վարչապետի արշավի պատճառով։

«Առաջին հերթին, Հայաստանի պետական պաշտոնյաները արդար և հավասար վերաբերմունք, ինչպես նաև լիարժեք պաշտպանություն և անվտանգություն Կարապետյանների ընտանիքի և նրանց ներդրումների համար Հայաստանում չեն ապահովել։ Երկրորդ՝ համաձայնագրի խախտմամբ ՀՀ պետական մարմինները ձեռնարկում են քայլեր ՀԷՑ–ի նկատմամբ վերահսկողություն սահմանելու ուղղությամբ, ինչը հավասարազոր է ներդրումների բռնագրավման։

Եթե պատկան մարմինները շարունակեն խախտել համաձայնագրով և միջազգային իրավունքով իրենց ստանձնած պարտավորությունները, Հայաստանն առերեսվելու է միջազգային արբիտրաժային վարույթի և դրա արդյունքում ամբողջական փոխհատուցում վճարելու պարտավորության հետ»,– մասնավորապես ասված է հայտարարության մեջ։

Ծանուցման մեջ բաժնետերերը պնդում են, որ ՀՀ պաշտոնյաների գործողությունները կամայական են, խտրական, քաղաքական դրդապատճառներով և ուղղված են ՀԷՑ–ի միջոցով Կարապետյանների ընտանիքին սեփականությունից զրկելուն։

Բաժնետերերի խոսքով՝ այս գործողությունները խախտում են 1995 թ. հունվարի 18-ին Հայաստանի և Կիպրոսի միջև կնքված համաձայնագրով ստանձնած մի շարք պարտավորություններ, որոնք պետությունը պետք է կատարի։

Հայկական գինիները բարձր են գնահատվել IWSC 2025 միջազգային մրցույթում, որն անցկացվել է Վրաստանում՝ Գուրջաանիի գինու փառատոնի և Վրաստանի Գինու ազգային գործակալության հետ համագործակցության շրջանակում։ Մրցույթը ներգրավել է ավելի քան 400 հայտ, այդ թվում՝ գինիներ և ալկոհոլային խմիչքներ Վրաստանից, Հայաստանից և տարածաշրջանի այլ երկրներից: Հայաստանը նվաճել է ավելի քան 30 մեդալ, որից 4-ը՝ ոսկե, ինչը նշանակալի ձեռքբերում է մեր երկրի համար։

Ոսկին ստացել են՝
- Anamor Grand Reserve 100% Areni Noir Red Dry 2021-ը (Manukyan Brandy Factory) – շնորհվել է 96 միավոր՝ մուգ բալի, նռան, հապալասի բարդ բույրերի և եղեսպակի ու սպիտակ պղպեղի նուրբ շեշտադրումների համար: Գինին աչքի էր ընկնում իր փափուկ հյուսվածքով և հավասարակշռված համով։
- Noah of Areni Noa Reserve 2021-ի դեպքում դատավորները նշել են բարդ անուշաբույր պրոֆիլը՝ մոշի, հասած սալորի և քաղցր բալի նոտաներով, որոնք լրացվում են կաշվի և թարխունի նրբերանգներով:
- Moossah Red Dry Wine Areni Noir 2022-ը (Winged Lion)՝ համի նրբաճաշակության և հատապտուղների և բուսական նոտաների ներդաշնակության համար:
- Amber By Moossah 2022 (Winged Lion)՝ մեղրի, չոր մրգերի և ծաղկային նոտաների հարուստ բույրի համար:

Հայ մասնակիցների հաջողության առանցքային տարրն է դարձել «Արենի» ավտոխտոն տեսակը։ Դատավորները նշել են, որ այն ցուցադրել է իր բազմակողմանիությունը ոճերի լայն շրջանակի միջոցով՝ դասականից մինչև ավելի նորարար, ընդ որոմ, լավագույն օրինակներն աչքի են ընկել իրենց նրբագեղությամբ, հավասարակշռությամբ և համի բարդությամբ: Հայ գինեգործները հաստատել են իրենց բարձր մակարդակը՝ շարունակելով ամրապնդել իրենց դիրքերը միջազգային ասպարեզում։